Email: mikeligalig@gmail.com

Ang atong panggobyerno dili madala ug pik-pik –pik-pik lang aroN pukawon. Nagkinahanglan ug tawo nga sama ni Ducat nga makamao mamukaw.

BANGKOK – Sakto tong gibuhat ni Armando Ducat. Nagtoo ko nga wala siyay tinguha nga pasakitan ang mga bata nga iyang gi-hostage.

Nakaseguro ko nga daghan ang susama nako ug panghuna-huna mahitungod sa hostage crisis nga nahitabo sa Manila dili pa lang dugay.

Angayan lang pud nga pukawon ang atong pangagamhanan mahitungod sa walay pagpakabana sa kahimtang sa edukasyon sa Pilipinas.

Bisan gani ang state universities ug state colleges nag-antos karon sa kagamay sa budget nga gihatag sa gobyerno. Unsa na kaha alang sa mga gagmayng bata.

Sa nahitabo nga hostage crisis, nakahinumdum ko sa programa ni City Mayor Dan Lim nga diin iyang gigahinan ug dakong kantidad ang mga elementary students alang sa ilang panginahanglanon sa pagtungha sama sa uniform ug sapatos ug uban pa.

Niadtong nagtungha pa ko sa primary, pastilang luoya sa akong mga classmates. Kadaghanan kanila walay mga tsinelas. Mosulod sa klase nga walay pamahaw. Motungha nga naglago lang ang hitsura.

Dihay kausa nga ang gipabalon ni Mama nga gatas ug pan gihuong sa akong classmate sa Grade 1. Sa iyang kagutom, napugos siya ug kawat sa akong balon. Inay masuko ko, nahinumdum ko nga naluoy hinuon ko niya kay nakahibalo man ko sa iyang kahimtang.

Kung sa syudad nagpuyo, dili ni makita sa mga opisyales ang tinuod nga kahimtang sa mga bata diha sa lagyong kalungsuran ug kabaryohan.

Unsaon kanang mga senador diha o kaha mga congressman nagpabugnaw lang man na sige sa Manila. Naglulinghayay lang sa ilang pagka-alagad man kaha sa katawhan.

Ug sa ilang pagpaharuhay, wala nila makita ang tinuod nga pagkabutang sa mga bata. Ang ila lang makita nga anaa silay ma-commission, o ingnon ta pagkaestoryaha, naay makorakot sa mga proyekto.

Mao nga kung maggahin ang usa ka opisyal ug proyekto alang sa mga bata, nahuna-huna niya nga wala siyay masapi gikan niini. Mao ang mga bata wala tagai ug pagtagad. Kinsa man ang gitagaan ug pagtagad?

Ang gitagaan ug dakong pagtagad? Ang irigasyon pananglitan.

Gastohan gud ug gatosan ka milyon ka pesos aron kunohay matubigan ang mga kabasakan sa mga kabos nga mag-uuma.

Apan ang linugdangan, walay bisan kanal sa tubig ang nabuhat. Unya walay mga ulaw kay didto sa ilang mga accomplishment report kunohay, humana ang irrigation project. Ang tinuod: ang report lonlon lang singgorotot-singgorotot.

Bisan sa third district sa Bohol, wa ko kadungog nga si Congressman Jala anaay gibuhat alang sa mga kabataan. Kung aduna man, asa man? Ug unsa kini ka bililhon?

Mao lagi, kung dili man masapian ang mga bata, mao nga nahikalimtan ang kaugmaon sa mga kabataang Pilipinhon.

Balik ta sa akong giingon nga sakto ang gibuhat ni Ducat.

Pareha ra na ug nagpukaw ka ug tawo aron siya makalingkawas sa dakong katalagman. Kung dili momata sa pik-pik o syagit, pwede na nimo yab-an ug tubig aron lang momata. O kaha dagkotan nimo ug kayo ang iyang tikod aron mapugwat. Masuko man siya, apan magpasalamat ra na nimo tungod kay kung wala pa siya pukawa, mamiligro ang iyang kinabuhi.

Ang atong panggobyerno dili madala ug pik-pik –pik-pik lang aron pukawon.

Nagkinahanglan ug tawo nga sama ni Ducat nga makamao mamukaw.

Mike Ligalig is blogging at www.onlyinphilippines.blogspot.com