Email: mikeligalig@gmail.com

kung unsa kahabog ang imong paglupad mao usab kasipa ang imong pagkahagba

Nahimong usa ka balita sa tibuok nasod sa Amerika kadtong usa ka kanhi CEO nga nahimong pizza delivery boy. Nabangkarote ang investment firm nga gitrabahoan sa maong CEO. Gikan sa minilyon nga kita gikan sa pagka-CEO, nahimong $60,000 plus (nalang) ang iyang annual income.

Sa standard sa Pilipinas, ang kapin $60,000 mobalor pud ug tres milyones ka pesos. Ang usa ka pizza delivery boy sa Pilipinas, mangapo nalang ang iyang mga apo, dili makasweldo ug tres milyones kada tuig.

Ang maong kanhi CEO wala magtigum sa iyang kinitaan. Paghagsak sa ekonomiya sa Amerika ug nawad-an siyag pangita, nakulob iyang kaldero ug naglisod siya paghayang niini. Unsaon nga sa diha pay kwarta, gapatoragas man sab ug gasto. Lulinghayaw sa Caribbean, Bahamas ug Barbados. Kaon sa mga mahalong restaurant. Palit sa bisan unsang alahas.

Dinhi ning atong lindog sa Tumoy Sa Bangaw dili pa lang dugay, naghisgot ta ug mga one-day millionaire nga Filipino nga mogasto karon ingon nga nagdahom nga mosira na ang tanang tindahan inigkaugma. Pag-abot sa kalisud sa panahon, anha pa mahinuklog kung giunsa pag-usik-usik ang salapi.

Bisan unsa man seguro ka dato sa tawo, kung walay hipno nga pagpadagan sa kwarta, mahubsan ra man gihapon ang bulsa. Kahinumdum mo ni Mike Tayson nga mokita ug kapin sa usa ka gatos ka milyon dolyares kada away kaniadto pero tungod sa kaabusado, gilibre nalang ni Manny Pacquiao ug tan-aw ug boxing kay di na kapalit ug ticket. Si Michael Jackson sab nga dihay kinataan nga binilyon panahon sa iyang pagsikat nagbilin ug utang nga mokabat $400 million human sa iyang kamatayon.

Gani kini si Manny Pacquiao, bisan unsa niya kadato karon, kung dili niya ipahiluna ang iyang salapi, mahurot ra gihapon kini, labina kay hilabihan siya ka sugarol.

Naay giingon sa panultihon: kung unsa kahabog ang imong paglupad mao usab kasipa ang imong pagkahagba.

Mao bitaw ning mga politiko karon nga nanubra ra sa kahambogero ug kapagarpar, timan-i moabot ra ang higayon nga kon wala na sila sa poder, ngitngit pas alkitran ang ilang kaugmaon, labina kung walay mga negosyo nga gihuptan ug nagsalig lang ug pangawkaw sa salapi sa katawhan. Moabot ang higayon nga bisan pisi, lisod na paliton.

Mao bitaw nga kutob sa mahimo mangugat ug kapyot sa puwesto sa gobyerno kay kung dili na sila opisyal, asa naman silay ipalit ug toyo ug suka? Nga kung tan-awon ang ilang mga resume wala may mga specialized skills ug professional job experience nga ilang magamit sa pagpangaplay ug trabaho.

Ug dili lang kini nahitabo sa mga politiko, nahitabo na kini sa daghang mga manunod ug katigayonan sa ilang mga ginikanan, mga anak nga wala katilaw ug kahago ug nabulahan lang sa mga sakripisyo sa mga ginikanan. Ang Bibliya naghisgot na ug sanglitanan mahitungod niini (the prodigal son).

Ingon usab niini ang nahitabo sa mga gingharian kaniadto. Ang Mongolia nga gikaintapan kaniadto, asa naman karon? Ang Babilonia nga gikahadlokan kaniadto, asa naman karon? Ang Greece nga gihangad kaniadto, asa naman karon? Ang Egypt nga gikalisangan kaniadto, asa naman karon? Karon ang Amerika gidugokan pa, apan moabot ra sab ang panahon nga kining nasora magdahik nalang sa abog. Napamatud-an na kini sa karaang sugilanon sa mga nasod sa kalibotan.

Walay tawo o gingharian nga magpasigarbo kay usa lang ang tinuod nga gamhanan sa tanan ug ang Iyang gahom walay sukod ug walay kataposan: kana mao ang Diyos sa Bibliya. Gani miingon ang atong Ginoong Hesukristo nga kadtong magpataas ipaubos ug kadtong magpaubos ipataas.

Daghan unya sa mga dungganon karon sa kalibotan nga pag-abot sa paghukom sa Ginoo, dili hinunduman ang ilang mga pangalan. Ug daghan usab sa mga wala hiilhi nga mga tawo karon nga pag-abot didto sa langit, VIP ang treatment sa Ginoo nila.

Puwera saway lang pud, daghan baya pud kanatong mga Pinoy nga hambog ray gadaghan nga bisan ug way ikabuga magpatoo nga bulawan ang silhig sa pantawan. Bisan diha sa trabaho, daghang motamihid sa mga janitor, driver, hardenero, labandero, kusinero kay manager ray daygon. Walay mo-enroll ug agriculture nga kurso kay dili gusto tawgon nga mag-uuma. Dili gusto motinda ug asin ug ginamos kay SM ang gusto tukoron. Dili mosul-ob ug tsinelas kung molakaw kay hadlok tamayon sa silingan nga dalag ug tikod. Dili moinom ug tubig sa restaurant kay gusto ipakita nga Sprite gyud ang iyang kinaham. Dili mosugot nga dili ihunong sa St. Jude sa tungod sa ilang balay bisag usa ra kadopa ang gilay-on sa ginaugan sa laing pasahero kay maulaw makit-an nga gabaklay.

Nahinumdom ko sauna nga dihay magpa-maid sa Manila nga inig-uli sa among baryo dili na mosakay ug bus de pasahero kay mopakyaw gyud ug sakyanan gikan sa Tagbilaran. Kay lagi nakatunob na ug Manila. Ang uban, kay lagi nakangadto na ug abroad. Nausob na ang hasang.

Tanang tawo anaay garbo apan adunay mga garbo nga wala mapahiluna.

Unsa kahay mahitabo sa pamilya adtong kanhi CEO nga karon pizza delivery boy kung garbo pa ang nagpasulabi sa iyang kinabuhi?